Ufufu Cafe (已結業)

應該大部份人都係同我一樣，為咗佢嘅芭菲慕名而嚟。所以為咗留肚食甜品，除咗鐵板炸雞外，我哋只係叫多個牛油果大蝦凱撒沙律。『鐵板南蠻炸雞』係值得推介項目，加咗蔥煮當然比較香，配埋 tar tar sauce 又變得唔會太乾身。雞肉滑滑 der，但始終係鐵板燒，食物放太耐質感都會有所改變，所以係建議趁熱食。唯一 comment，我個人唔太喜歡墊底嘅一大堆芽菜。『牛油果大蝦凱撒沙律』賣相普普通通，份量唔算好多但生菜好 fresh，另一美中不足嘅地方係啲蝦細粒咗少少。到咗重點嘅芭菲，佢有超過 100 款選擇架，如果你有選擇困難症，除非你有特別喜好或 preference，我建議你不如咪埋眼求其點一個應該會快啲。每款都有好幾層 layers，有 soft ice-cream， 有 corn flakes，有 jelly，層層都唔同口感。啲生果又幾鮮甜，應該係日本直送吧？起初只知道呢度係食芭菲，食埋佢嘅鹹點真係幾喜出望外！我諗我會返嚟試佢個鐵板漢堡！