金輝燒臘

營業中

休息中

好耐無同呀媽行街市，今日既然佢老人家叫到，當然要陪下佢。買完魚同菜之後，呀媽就話不如今晚斬料番去食，燒味我最鐘意食，緊係話好！ 其實自己都好耐無行街市，不過依稀仲記得呢間燒味鋪細細個已經係度，不過呀媽一定清楚過我。佢話沙田街市開既時候，鋪頭已經係度，佢自己都成日幫襯，我由細食到大。 見到擺出嚟既燒味，色彩鮮豔，又有光澤。於是就斬左叉燒，燒肉同埋燒鴨番屋食。 打開發泡膠盒，先發現原來師傅都好細心咁將各樣燒味擺得整齊，仲諗住普通燒味都係求奇放埋就算，唔怪得開業多年都屹立不倒。睇番三樣燒味，真係比晒肉既部分我地，非常老實！ 叉燒肥瘦適中，表面有蜜汁，食落唔乾身。 燒肉，好有肉地，皮還帶少脆，連埋芥辣食一流！ 燒鴨皮脆啖啖肉，無咁脂肪，緊係要點話梅醬。咁多咁好食既燒味，結果當然係要再添飯啦！我發現金輝除左燒味本身味道唔錯，仲有一份人情味係裡面。