Cafe Ceres (已結業)

原本去野餐，但擔心雷暴驟雨唔知响邊區，取消咗。早起身，同友人E小姐去九龍城食早餐飲啡。我要Egg Benedict，但冇得揀只有煙三文魚。個荷蘭汁都幾有檸檬汁同牛油香，但份量偏少，蛋冇討厭腥味但蛋白太老稍嚡，三文魚係挪威貨，唔太腥，鬆餅好薄好脆帶牛油味。沙律菜有藍莓醬味，甜甜地幾好。Flat White飲落酸澀平衡，可惜啲泡好快散，而且泡粒好粗。服務麻麻地，笑容欠奉講嘢倔，要重複叫先應客，唔熟悉餐牌。海軍鬥水兵，但Delight近我屋企，而且服務冇咁差，嘢食賣相又靚啲。