影片
更多
2013-04-09
2958 瀏覽
大肥爸爸聽朋友講，話皇后大道東有間新酒店Indigo，酒店未開而其中菜廳已經開業，就叫細佬去調查一下。有一日，XO仔放工時，見「金碧軒」真係開左燈，所以就走左入去同接待處嗰位姐姐傾左兩句。據悉，餐廳提供粵菜，午市主打飲茶，不過都可以叫餸食，歡迎訂座，佢仲比左張卡片我攞比爸爸交差添。碰巧家中舅父啱啱返香港，爸爸又想試新菜，大家就決定訂位喺「金碧軒」為舅父洗塵。「金碧軒」及其酒店位置真係好方便，地鐡，巴士，小巴，電車，的士，乜都到，反而私家車就麻煩少少，因為未有代客泊車服務，而且街市個停車場好爆，我地去嗰日成條街都塞滿哂等緊位o既私家車。餐廳分開兩層，入門口嗰層有接待處同等位處之外，原來仲有三間大房/宴會廳。搭升降機落到去底層，除左有散枱同一間大房，大家會見到右手邊有個為吸煙o既客人而設o既露台，不過此乃酒店區域，而非中菜廳範圍（Indigo酒店同「金碧軒」係唔同老闆o既）。 我地幫襯嗰晚，除左我地七個人之外，只有另外一張細枱有客，佢地走左後我地仲包埋場添。可能人客唔多，所以當晚o既服務特別好。我地一埋位，徐經理已經自動走過黎同我地打招呼，介紹不同菜式，更解答我地好多不同o既問題，如「金碧
「金碧軒」及其酒店位置真係好方便，地鐡，巴士，小巴，電車，的士，乜都到，反而私家車就麻煩少少，因為未有代客泊車服務，而且街市個停車場好爆，我地去嗰日成條街都塞滿哂等緊位o既私家車。
餐廳分開兩層，入門口嗰層有接待處同等位處之外，原來仲有三間大房/宴會廳。搭升降機落到去底層，除左有散枱同一間大房，大家會見到右手邊有個為吸煙o既客人而設o既露台，不過此乃酒店區域，而非中菜廳範圍（Indigo酒店同「金碧軒」係唔同老闆o既）。
我地幫襯嗰晚，除左我地七個人之外，只有另外一張細枱有客，佢地走左後我地仲包埋場添。可能人客唔多，所以當晚o既服務特別好。我地一埋位，徐經理已經自動走過黎同我地打招呼，介紹不同菜式，更解答我地好多不同o既問題，如「金碧軒」其實係喺年廿八低調開張等。徐經理非常稱職，佢落單時先問我地趕唔趕時間，提議如果我地唔趕，不如先上四款小食送酒（開瓶費為$100/枝），其餘啲餸再慢慢上，真係諗得好周到。佢o既班底亦不遜色，姐姐仔都會不時加茶加水，更會自動換碟，令大家都食得好衛生。大家其實都係抱住一個黎試食o既心態，見每道例牌菜都唔係咁大碟，最終就叫左多味不同款式o既餸菜：
黃金豆腐粒（$80）：此乃小肥食過咁多黃金豆腐粒做得最出色o既一家！從其賣相已經可以睇得出豆腐粒炸得好乾身，少辣o既調味粉又唔會過多，咬落更覺皮脆餡嫩，姨丈仲大讚「好有山水feel」添。請留意，大家千其唔好一口成粒食落肚，因為個山水豆腐心真係好熱。
蔥油海蜇頭（$80）：海蜇頭質感爽脆，味道帶甜，香口小食也。
鹵鴛鴦鴨舌（$80）：大懶爸爸大讚鴨舌起哂骨，不過小肥就嫌起左骨o既鴨舌少左條軟骨，冇左卜卜脆嗰部份口感，只可以講句大家口味不同。所謂鴛鴦其實係指分開兩邊上o既鴨舌一邊辣，一邊唔辣，調味汁酸酸辣辣，好醒胃。
椒鹽田雞腿（$120）：田雞腿熱辣辣，非常野味，送酒一流！
梅菜蒸菜心（$120）：用荷葉墊底及蒸籠上，賣相好有特色，不過份量就似乎吝嗇左少少。表妹話梅菜唔咸，菜心又唔老，個餸做得唔錯。
蒜泥白肉（$80）：豬肉片切得夠薄，粉皮又唔會黐埋哂一齊，中辣o既調味汁自動分開上，不過小肥略嫌個汁唔夠蒜香。
鳯梨咕嚕肉（$140）：咕嚕肉肥瘦適中，炸粉唔會太多，咬落肉質軟熟，味道唔錯。據徐經理所講，個咕嚕肉係用新鮮豬黎做，所以個效果會較非一般。燕盞琵琶豆腐（$200）：原本一客六件，但經理見我地有七個人，所以就自動提出做七件比我地，感激感激！小肥印象中，琵琶豆腐應該係炸物，不過金碧軒演繹成蒸物，感覺清新同健康左，唯一一個問題係蒸出黎o既琵琶豆腐整體變得比較實，遺失左豆腐軟熟o既質感。
東坡肉（$238）：我地寫餸時，徐經理極力推介，所以就叫左份黎試。東坡肉雖則肥，不過的確做得好腍好入味，送飯佳選！
脆皮蔥油雞（$240/半隻）：餐牌中列明為廚師推介之菜式也。菜如其名，真係好夠脆皮，同桌愛雞皮之人都極為欣賞！蔥油雞毫不肥膩，好似師傅預先去左層肥咁，加上雞肉香甜幼嫩，大家都好滿意！
苦瓜炒牛肉（$160）：苦瓜甘香，牛肉嫩口，爸爸話好合格。琥珀蒜片牛柳粒（$180）：牛柳粒比較油，炒得唔夠乾身；雞髀菇多過牛肉，蒜片又唔多，可以話係全晚最失水準之菜式。
總結黎講，「金碧軒」地點方便，餐廳入面坐得舒服，服務一流，食物有水準。小肥唯一覺得有問題就係價錢貴左少少；雖則話每款菜式都係百幾二百蚊，但份量少，所以埋單時就覺得唔係咁抵啦！
張貼
