名人私房菜 (已搬遷) 新店位置

黎得食私房菜，當然有所期望，想食平時係屋企未必食到既野，但又想有住家feel既食物，呢間私房菜似乎做到。先黎紅蘿蔔菜乾豬肺湯，一睇色水就知道係老火湯黎，紅蘿蔔菜乾煲到出晒味，加上豬肺就零舍滋潤，豬肺食落更加係彈牙爽滑，我鍾意。跟住黎豆鼔蒸白鱔，白鱔蒸既時間係剛剛好，食落除左超滑，仲食得出鱔肉既鮮甜味，雖知道鱔肉鮮起上黎比其他深海魚可以更鮮。豆鼔味濃而不咸，加上蔥花既香，食落真係香而鮮。跟住呢味係黑椒蝦碌，每隻蝦都炒到非常香，蝦殻脆香，蝦肉鮮而拌上黑椒粒，所以味道係非常惹味，個人認為比避風塘炒法更正。鍾意食豬手既朋友不容錯過啦，南乳豬手煮到非常香，豬手外皮煮到超脆，而且口感充滿骨膠原，而無論外皮或豬手肉都有香濃南乳味道，呢種煮法比普通炆豬手味道更吸引呀。