點心到 (廟街)

營業中

休息中

今日專登出佐敦買廚房用具同冲咖啡用品，行足兩粒鐘，走勻幾條街，又攰又肚仔餓之餘，又話今晚即將轉八號風。即刻嗱嗱臨搵下附近有的乜嘢好食。見到大大間「點心到」，新派裝修飲茶食點心餐廳，一於嘆番杯茶，食番一盅兩件。點心選擇種類都多，除點心、有籠仔蒸飯，仲有燉湯同甜品。另外，如果唔想飲中國茶，亦有各式汽水，或者可選擇咖啡、奶茶、檸茶等等。《晶瑩鮮蝦餃》、《原隻蝦燒賣》係必食，果然燒賣隻蝦好夠大隻，鮮甜爽口彈牙。蝦餃都皮夠薄滑。最正係有兩粒或四粒揀，兩個人揀兩粒，就吾使驚食唔曬。《豉汁蒸鳳爪》、《上海小籠包》、《黑松露菜苗餃》同《濃湯鮮竹卷》，每款都係阿仔同我喜愛，整體上水準都唔錯。加上最緊要即叫即蒸，上抬夠熱就更加好味。最後加多個《楊枝甘露》甜品，話時話好耐冇食。呢個都吾錯，足料夠香甜。相比一般酒樓，呢間點心係全日供應，一想食就可以嚟食。吾使好似以前，要一大清早起床去攞位。任何時候想食點心、飲番杯茶，呢間的確係不錯選擇。