52C Medium Rare (已結業)

前排行開佐敦，去咗一間石燒餐廳食晚餐。朋友揀咗下腰西冷套餐，西冷肉質好juicy，而且大大塊，食得好過癮。我試咗佢哋嘅封門柳套餐，排身比西冷厚。牛味好重，咬落去好有口感。佢哋上菜嘅時候會用熱辣辣嘅石板，我覺得餐廳好貼心，因為佢哋會提供圍裙。仲會放多一隻碟，畀食客按照自己嘅喜好燒好再擺開，咁樣就可以保持理想嘅質感。套餐配沙律、餐湯、白飯，仲有牛油。飲品我就揀咗佢哋嘅自家製竹蔗茅根水，飲落去好健康解毒，唔會有罪惡感，見到真係有蘿蔔、馬蹄同蔗，好足料！朋友想去水腫，揀咗佢哋嘅自家製檸檬薏米水，都好好飲。除咗自家製飲品，餐廳嘅雪糕都係自家製，味道好特別，有薑味、紅棗茶味、龜苓膏味同火麻仁味等等，勁有驚喜！我本身唔係太鍾意食薑系甜品，覺得好辣，但係喺侍應哥哥嘅大力推介下揀咗薑味雪糕，辣味啱啱好，香得嚟唔會太突出，好似番薯糖水咁有吊味嘅作用。朋友越級挑戰，叫咗龜苓膏雪糕，真係有加應子！食落唔會好藥材味，反而有一種回甘嘅感覺，拿捏得好好。