Le Steak Specialiste (已結業)

Item: Le Steak Specialiste
Rating: 4
Author: Nei bb

Le Steak Specialiste

42 食評

味道

環境

服務

衛生

抵食

463

佐敦

$101-200

多國菜扒房

Nei bb

等級4

564

佐敦廟街係一個匯聚多元文化既地方，想食咩菜式、平平貴貴都可以搵到。同朋友經過呢區想食個簡單晚餐，係門口餐牌見到呢間Steak House有好多唔同種類既餐點供應，價錢亦相當貼地，各適其適，所以決定試一次。
.
餐廳係最傳統舊式格局，沒有華麗既裝修，唔走精緻碗碟、擺盤路線，而係用菜單款式同食物質素吸引客源。鋪頭應該係以街坊熟客，或者附近番工既食客為主。樓面似乎由老細坐鎮，見佢同一班熟客有講有笑介紹時令菜式、煮法。眼見食客們都好信佢既推介，因為老細會講今日有啲乜嘢冇整啲乜嘢，有少少似去食私房菜咁。例如偷聽到隔離枱問老細今日有冇整雪糕🍨🍧，老細好似話今日唔得閒，下個禮拜先整啦🤣。當下心諗，連雪糕都自己整？
.
食物有海量既選擇供應，有大量唔同套餐同單點選擇、種類海鮮豬牛雞羊、由平民牛扒以至上千元既斧頭扒、中西式前菜飯麵意粉甚至湯麵餐點、飲品由紅酒白酒乾邑特飲即磨咖啡至一般到茶餐廳飲品、連生蠔都提供兩款選擇。未坐低前都估唔到係一間咁細既小餐廳，竟然對自己嘅菜單款式要求咁高，好佩服。
.
老闆誠意推介左好多野，兩個人叫咗兩份牛系套餐、三款小食同兩款甜品。
.
小食1️⃣至尊孖寶: 極品鮑魚酥盒 + 大明蝦酥盒 💲128
⭐️4/5
我唔食鮑魚所以淨係食咗蝦酥盒，眼見似乎係一樣嘅嘢不過唔同嘅topping。睇個價錢百靚蚊有鮑魚有蝦，以為應該係細細件一啖款前菜，但係估唔到上檯超大份😧，仲要落足料。酥盒入邊有好多唔同款嘅蔬菜香菇等等，啱啱焗起外皮脆蔬菜配料濕潤，隻急凍大蝦大隻爽脆。賣相都算打卡able. 水準同埋份量比預期中高。
.
2️⃣蝦多士 💲38/件
⭐️3.6/5
個人好喜歡蝦多士菜式，周圍都好鍾意試吓。呢份蝦多士正常發揮，法包加爽脆蝦膠，比起酥盒份量唔算太大一件兩口食完啱啱好。
.
套餐（跟餐湯及飲品）
1️⃣ 美國安格斯漢堡牛肉三文治 💲129
⭐️3.8/5
因為好想食甜品，所以喺海鮮豬牛羊雞套餐入邊揀咗一份最輕盈嘅安格斯牛三文治諗住留quota俾甜品😄。三文治都好大份，麵包係用烘香健康系列麥包，安格斯牛漢堡有肉汁，加上蕃茄生菜沙律醬等等，相對上輕盈。
.
2️⃣香草燒草飼牛肉眼 💲159
⭐️3.8/5
餐廳名係Steak House 所以朋友話無論如何都要叫🐄🥩牛扒。知道喺西餐廳叫嘅牛扒通常都會比較熟所以叫三成熟，結果出到嚟感覺剛剛好。入邊仲係嫩紅色，留有肉汁。雖然如果你問我嘅話，我覺得呢塊牛扒牛肉味唔重，可能始終呢款係餐廳入面最平嘅一款扒。佢餐牌仲有提供好多更加高質素牛肉嘅部位或者種類，由幾百都過千一塊都有，如果想要靚牛扒嘅話要食貴啲。最近去過好多唔同嘅港式西餐廳，隨便單點一塊比佢細塊嘅牛扒講緊都要三、四百起跳。呢份只係百零蚊仲要跟埋嘢飲餐湯，單以性價比來講冇咩可以負評。
.
甜品
1️⃣心太軟 💲50
⭐️3.8/5
心太軟即點即焗所以等咗都一段時間，因為怕唔夠熱所以隨便影咗兩張相就開動。呢份甜品唔算甜，流心做到剛剛好朱古力味幾重，蛋糕亦都幾滑ok。
.
2️⃣糯米糍 💲45
⭐️4.2/5
成晚最有驚喜竟然係呢份綠茶糯米糍。糯米糍都有兩種口味嘅選擇，包括綠茶同紅豆。大大粒，個綠茶皮做得非常濕潤軟糯。入邊有鮮忌廉同綠茶蓉，甜度啱啱好。我忍唔住仲要問老細係咪自家製，老細話係佢哋自己整放咗鮮忌廉，仲問我好唔好食👍🏻。真係非常佩服佢地地呢份誠意。
.
總括：食到尾朋友同我講，呢間餐廳食物出品好有誠意，睇得出老細真係俾左大量心機去做。但就有少少比餐廳舊式裝修或者擺盤等等耽誤了，令到可能會少咗新嘅客人願意好主動去慢慢發掘佢嘅內在美，有少少可惜。叫左咁多嘢埋單六百零蚊，性價比👍🏻。