焱燒串燒專門店 (已結業)

其實好少係佐敦食嘢，今次因爲去探朋友，所以順便係附近食埋晚餐。朋友帶路搵食，知我鍾意摸下酒杯底，於是去咗呢間「焱串燒」。朋友之前買過外賣試過不錯，今次搵我陪佢坐低食餐飽。店子不太，門口設有一張檯，半露天方便吸煙既朋友仔坐。如果怕熱可以選擇坐店內，店內大概有四張檯。點餐係用QR code 自助落單。食物種類十分多。除了一般常見肉類（豬、牛、羊、雞）串燒，亦有蔬菜類，仲有很多款海鮮類。餐廳亦提供有兩款香辣粉供客人自助使用，一隻微辣有花生《秘製香辣粉》，我就喜歡另一隻《辣椒粉》較香辣，大家可以隨自己喜好去試。蔬菜類點咗最愛《原條蒜香茄子》（$35），茄子肉厚，面層鋪上大量香濃蒜蓉醬汁，茄子皮吾會燒燶曬，第一次可以連皮都食埋。另外燒《韮菜》（$14）好嫩好出色，吾會燒到乾曬，仍保存菜汁而且冇根吾黐牙，呢兩款蔬菜推介必食。邪惡《盬燒香脆雞皮》（$20）係吾少得，呢個就反而鍾意佢夠乾身，脆卜卜而又吾會焦燶曬，甘香雞油回味。推介必食！餐廳推介《焱燒自家製叉燒串》（$18）真係值得一試，味道醃製不錯，叉燒肉爽彈。點咗至愛《汁燒白鱔》（$38），肉厚肥美，燒到塊皮少少乾脆，而又保存肉汁，好昧價錢又合理。