太陽軒飯店

營業中

休息中

呢排返工實在太攰，好耐都冇同屋企人食飯，今晚難得可以準時收工，一於同佢哋食餐好嘅！家姐知道佐敦新開咗一間中菜餐廳，所以已經訂咗枱！呢間餐廳位於佐敦吳松街，叫太陽軒，有上下兩層㗎。我哋被安排坐上層廂房，房間入面有獨立電視，環境舒適。媽咪發板叫野食，首先，清清哋，先嚟個普寧炸豆腐，呢個豆腐唔係普通啊炸豆腐咁簡單，佢豆腐嘅質地比佢實，食落有口感，入面仲好滑添！第二個就係酥炸蝦蟹棗，佢係用咗新鮮蝦肉同蟹肉所整成，蝦丸又彈牙，蟹丸又足料，最緊要係自己唔洗剝殼，非常方便！出街食飯一定唔可以唔叫菜食，呢個金華四寶蔬就實而不華，草菇、冬菇同娃娃菜用上湯煮成，上面仲鋪上幾塊金華火腿，為呢個菜畫龍點睛。平時小弟都鍾意食滷水嘅菜，今次就一於試下個小滷水拼盤，拼盤有鵝片、滷蛋同豬耳等，令我揾番細個同婆婆出去飲茶嘅美好回憶！食晚飯一定要有飯落肚，呢個黃金炒飯令我好滿意，除咗足料之外，佢炒到啲飯粒粒粒乾爽，蝦仔飯咁，真係食哂一碟都得！最後，聽過店員推介，我哋就試咗個沙窩老爺雞 ，雞肉勝在夠入味，又唔算韌，大家可以不妨一試！小弟推薦大家食中菜嘅話可以嚟呢度試下！