蓮香居 (已結業)

星期日晏晝去蓮香居飲茶,上咗3樓要自己搵位,小學之後都未試過要自己搵位,我哋三個人喺咁多枱前面有啲迷惘,大家決定分散投資考下自己眼光估下邊張枱就嚟走.成件事都充滿挑戰性,我企埋咗成枱女人嘅枱（估錯曬,最後我哋食完嘢嗰枱女人仲傾緊計. ）搵位真係好難,最後叔叔執緊枱嗰陣叫咗我哋埋去坐低,先有得食咋.坐低叫咗個陳皮鴨腿湯飯先,過咗12點就會賣曬㗎啦.鴨腿個湯好好飲,飲曬啲湯都好飽啦. 跟住就等緊我最鍾意嗰個梅菜叉燒包,等極都冇, 問阿姐阿姐話2樓先有得賣你想食就自己落去買啦. 跟住就要搶蓮蓉焗布甸,每個鐘會出一次每次出十個到一出就冇㗎喇,所以我哋就要喺個廚房門口嗰度等啦. 熱辣辣嘅布甸一樣咬落去好幸福. 仲有見到平時少食嘅點心,例如新鮮嘅皮蛋酥,芝麻糕,鹹菜豬肚湯,酥皮蛋撻,豬潤燒賣,南乳豬手,好多都想試.愛上咗呢一間蓮香居,感受到傳統茶樓嗰種風味同人情.想飲茶咁要自己搵到位先啦,想食布甸ar咁你就諗辦法搶到啦.成件事好香港好得意,同平時去開由門口開始到坐低都有人serve嘅一般茶樓好不一樣.我開始期待下一個禮拜又去試下睇下搶到啲咩點心食啦.補番張焗布甸嘅相.