千府·居食屋 (已結業)

朋友喺旺角放工，邊閒聊邊揾食最後行到嚟勝利道。當然大家都知曉呢度食肆林立。不過出名嘅餐廳並唔多，仿佛何文田呢個小區都有種被孤立嘅感覺。始終大部份香港人都習慣活動於旺角範圍。不過咁亦好好，因為小區唔算擠迫，反而可以慢慢篩選餐廳。最後行到街尾，發現有間新開嘅居酒屋，趙門微開，被內裹熱鬧嘅食客聊天聲所吸引過來。日系居酒店風嘅店面小小，不過都坐得幾舒服。當日好肚餓，所以亦冇多考慮就想點就點，最後滿滿一台菜式相當大滿足！餐前小食係由店員推介嘅開胃菜，有青瓜同蘿蔔條配特製鯷魚，酸甜有咸香。然後先來係刺身，整體都好新鮮，五點份量啱晒兩個人。然後開始嚟到驚喜環節，叫咗個「香煎牛油果蟹肉餅沙律」，份量驚人，比預期中多，自家製蟹肉餅有好濃蟹嘅清香，牛油果都好多好足料。壽司方面叫嘅係千府火灸盛盒，細細件好啱size，唔會撐太飽。另一個高潮位係兩道茶碗蒸 － 鱘魚籽海膽及松葉蟹膏蟹肉，蛋香都被兩款嘅topping蓋過，個人覺得係必點！另外餐廳嘅串燒都好高質，最後一讚佢個鰻魚炒飯，炒得香口惹味！