低調高手大街小食

營業中

休息中

自從香港社會進步，小販絶無僅有，街頭小食不復當年勇！但高手永遠在民間，只要用心發掘，隨時有驚喜。筲箕灣東大街兩旁食肆林立，老字號新食力長龍店遍佈其中。唯獨一間小店偏處一隅，但依然生意不絶，賣嘅只係雞蛋仔同格仔餅。店係真正小店，一眼睇晒得三員猛將。兵貴精不貴多，食物都係，只專心賣雞蛋仔同格仔餅，工多藝熟，所以夠膽自稱高手。😆雞蛋仔$16全部即叫即整，只見阿姐氣定神閒，倒漿入模，反模換邊，開蓋起貨，一氣呵成。剛起貨雞蛋仔熱得滯水氣未過未夠脆，所以會用有窿紙袋裝住，方便疏氣令雞蛋仔唔怕焗住，快啲風乾變脆，擰一粒試吓，一句講晒，外脆內軟夠蛋香，而且裹面唔會得空氣，有半粒雞蛋仔(有肉)鬆化得嚟又充實。甜度適中，而且食晒成包都仲脆。難怪敢自稱高手，低調得嚟仍然受客人擁載。如果喺咁高超技巧下，可加入其他口味，如朱古力，咁就有機會成為高手高手高高手喇。