香港飯堂

營業中

休息中

漢堡可以走牛肉，檸茶可以去檸檬，甚至乎冇雞的糯米雞，猴子都能夠接受，但係一條去掉香腸的熱狗，猴子一時間真係接受唔到。當侍應姐姐端出熱狗的一刻，猴子才如夢初醒。「這條熱狗，是否欠缺了甚麼？」猴子在心裡對自己說：「別怕，可能只係條香腸細得滯，被蛋白遮住而已。」但到了猴子用刀叉切開熱狗仍找不到香腸時，才知道原來塵世間，是存在著一種沒有香腸的熱狗，這就是黑松露炒蛋白熱狗…至於黑松露，只怪猴子學藝未精，實在吃不出它的味道，結果餘下來就只有淡薄的蛋白味和麵包味。或者廚師的原意是希望泡製一款健康而又清新的食品，因為唔少人食雞蛋只吃蛋白，嫌蛋黃高膽固醇（雖然有好多醫學報告都話雞蛋黃係屬於「好膽固醇」，對人體有益。）唔加香腸可能亦係出於同樣的健康考慮。猴子唔係話呢款熱狗唔好食，只係同猴子心目中的「熱狗」始終有落差。最後都係嗰句，整熱狗，千祈唔好「去腸」。