影片
更多
2011-11-27
385 瀏覽
早幾星期前師傅收到個來電, 原來係開飯網嘅聯絡人之一, 非常靚女嘅Natalie,起初師傅還以為靚女Natalie想約師傅去街街, 點知唔係, 反而係想約師傅食飯, 真係令師傅受寵若驚, 不過原來唔係兩個人, 而係一班人! 靚女Natalie誠邀師傅出席一個飯局, 名為“暗中開飯夜宴”, 對話中靚女Natalie講得個飯局好吸引, , 所以師傅唔理得當日會有幾忙, 亦都答應出席! 而師傅亦喺呢度再次多謝 貴網嘅邀請!當日師傅喺監房真係忙到咩咁, 好唔容易先走到, 由於到目的地都要一段時間, 加上講明逾時不候, 更令師傅七上八落, 都唔知去唔去好, 唯一再次致電靚女Natalie報告情況, 而靚女Natalie叫師傅盡趕, 既然係咁師傅唯有盡力, 更希望地鐵司機可以幫忙飛一兩個站啦! 終於師傅亦能趕上飯局, 亦係當晚最後一個出現的食家!入到場館已經知道主辦單位開始介紹, 不過師傅完全聽唔入耳, 鬼咩, 跑到隻狗咁, 條氣有排都未回, 好唔容易先至聽到介紹話相機, 電話, 眼鏡或所有反光嘅個人物品入都不準帶入餐廳裡, 而進入餐廳前每人會先獲得一支手杖(盲公竹), 亦明確表明是次飯局係漆黑一
當日師傅喺監房真係忙到咩咁, 好唔容易先走到, 由於到目的地都要一段時間, 加上講明逾時不候, 更令師傅七上八落, 都唔知去唔去好, 唯一再次致電靚女Natalie報告情況, 而靚女Natalie叫師傅盡趕, 既然係咁師傅唯有盡力, 更希望地鐵司機可以幫忙飛一兩個站啦! 終於師傅亦能趕上飯局, 亦係當晚最後一個出現的食家!
入到場館已經知道主辦單位開始介紹, 不過師傅完全聽唔入耳, 鬼咩, 跑到隻狗咁, 條氣有排都未回, 好唔容易先至聽到介紹話相機, 電話, 眼鏡或所有反光嘅個人物品入都不準帶入餐廳裡, 而進入餐廳前每人會先獲得一支手杖(盲公竹), 亦明確表明是次飯局係漆黑一片, 從而感受不過看的時候!
是次飯局有廿四人, 有從前認識嘅食家, 亦有新相識的食家, 廿四人係分四張枱, 每六人一張, 而師傅就被安排於“思”枱, 同枱食家有sosoku, 架架麵, pandamen, 搵食能手同埋菲比熊! 當要進入餐廳時, 就被安排每三個人一組, 當時心情既興奮又緊張, 師傅雖然不至於見識廣博, 但亦不是孤陋寡聞, 但摸黑進食同要睇驗盲人, 真的還是首次!
一行入餐廳, 真的漆黑一片, 真係有眼都睇唔見, 而呢一刻手杖亦發揮其功效, 加上亦有導航員帶領, 係憑著聲音而帶領, 並唔捉住你隻手而行, 好唔容易先至行到去“思”枱! 坐底後, 係絕對冇人點爉燭, 於是師傅就用手去摸下枱面上有咩東西, 有刀有叉有水杯, 好明顯係食西餐! 當六位食家坐底後, 導航員正式自我介紹, 而為本枱服務的正是perry!
由於不能拍照, 所以是次冇相片提供, 加上為了繼續保持神秘感, 所以是晚有咩食亦不再談論, 簡單講下就係有頭盤, 主菜, 甜品和餐飲! 漆黑一片底下, 師傅到底應該點食呢? 隻碟有幾大? 件食物放左喺碟邊度呢? 攞起刀叉, 竟然搵唔到件食物, 為左尊重大會和堅持師傅嘅宗旨唔浪費, 所以師傅決定用手食, 雖然感覺好似唔太禮貌, 但漆黑裡根本睇唔到啲咩, 更惶論食相, 如是者就三道菜都係用手食! 味道都算幾好, 不過份量就略少, 席間都聽到有幾位食家話唔夠皮!
值得一提係導航員perry, 真唔明點解咁漆黑裡佢仍然能夠為我們服務得井井有條, 有食家當時問係咪帶左夜視鏡, 但師傅覺得唔係, 反而覺得佢可能平時已經睇熟左環境, 就好似喺自己屋企一樣, 而呢個迷底喺飯後終於揭盅; 原來為我們服務的係全失明或尚餘少部份視力的人仕, 當迷底揭盅後, 在場食家無一不給予熱烈嘅掌聲, 以示謝意和敬意! 而師傅亦想起一首歌 – 你是我的眼! 雖然師傅能看,但漆黑裡perry成為師傅的眼了!
是次絕對係一次非常好的體驗和經歷, 於漆黑裡, 師傅不停明自己如果真的盲了, 咁師傅會如何面對呢? 生活又會變成點呢? 師傅當然唔知道亦不敢再諗, 但感謝天父喺呢一刻仍然給予師傅有視力和健康和完整的身體, 為此獻上感恩! 最後想用以下嘅金句作為總結: "耶穌過去的時候、看見一個人生來是瞎眼的。 門徒問耶穌說、拉比、這人生來是瞎眼的、是誰犯了罪、是這人呢、是他父母呢。 耶穌回答說、也不是這人犯了罪、也不是他父母犯了罪、是要在他身上顯出 神的作為來。 趁著白日、我們必須作那差我來者的工。黑夜將到、就沒有人能作工了。 我在世上的時候、是世上的光。耶穌說了這話、就吐唾沬在地上、用唾沬和泥抹在瞎子的眼睛上、 對他說、你往西羅亞池子裡去洗、（西羅亞繙出來、就是奉差遣）他去一洗、回頭就看見了。"(約9:1-7)
張貼