蝦匠 (已結業)

九龍城除左有香港小泰國稱號之外，其實最近進駐唔少特色美食。最新發現一家蝦麵店，係有摻摻食嘅蝦麵啊！【蝦匠】位於獅子石道近街頭位置，不難找。店內環境闊絡，光線充足。非常讚嘅係店家用嘅點餐紙係過左膠，可以重複使用！！點餐紙跟車仔麵有點相似，先選好湯底/麵底就可以自己加餸，當然各有不同收費啦。我就揀好用八斤蝦頭蝦殼及豬骨熬三個鐘嘅蝦匠湯底，配摻摻啦！摻摻即係油麵加米粉，而本身蝦匠湯底已經有魚片、豆卜、蝦仁、扎肉、芽菜。而我再加左花膠、蝦匠滑、竹笙、半隻龍蝦。花膠又爽又淋 ; 蝦匠滑就好香好彈牙 ; 龍蝦亦好大件肉亦好彈牙，店家有提供夾俾客人應付度隻龍蝦鉗(但要小心手啊)另外小食併盤亦不要錯過，一碟三款各兩件 : 雞翼、春卷、花枝丸。還有蝦匠皮蛋，都係小食必食之選