One More Hotpot 來一鍋 (已結業)

雖然天氣仲喺有啲熱，但踏入9月初秋嘅時分，打邊爐鋪癮又走返曬出黎，所以上星期我約咗朋友，一齊「來一鍋」，一邊烚下烚下，一邊吹水講下近況。來一鍋係正鵝頸橋隔離, 係時代廣場行過去都幾近。打邊爐幾怕去啲又迫又窄嘅地方打，行出行入唔方便而驚整到啲野食，而來一鍋好在環境闊落，張枱都大，叫成枱野食都夠位擺 (重點: 廁所都好乾淨, 唔似一般任食店 shrug)。來一鍋算係半任食火鍋店, 提供咗藥膳鍋及海鮮鍋兩款火鍋套餐以及10款唔同湯底。我地揀咗海鮮鍋配合花膠螺頭雞鍋濃湯湯底。佢個火鍋湯好足料，花膠同雞件數目超出想像，而且好夠味，最後我地忍唔住飲咗好幾碗。跟住湯底先上嘅，有安格斯牛肉，超長嘅即炸響鈴同魚皮。安格斯牛肉帶有豐富脂肪，烚一烚食落去入口即化。而炸響鈴同魚片有手臂咁長，淥完仲脆卜卜，仲有好濃厚嘅花膠雞味，正!重點出場，海鮮拼盤!!! 拼盤有大蝦、貴妃蚌、象拔蚌、生蠔、扇貝同鮑魚，數量可以拍得住主打海鮮鍋嘅鋪頭，而且食落去好新鮮，大滿足!我地仲食咗佢地手工製作嘅三寶丸、餃子，仲有啲任食火鍋配料。手打丸彈牙但可惜細粒咗啲，火鍋配料雖然任食但都有鴨血、冰豆腐呢啲特別野，令到我地有啲喜出望外。