美心皇宮 (已結業)

前幾天晚上同家人到美心皇宮食晚飯。三個人叫了三個“食送”同一窩翅。天山菇扣鵝掌：天山菇其實只不過係大大隻嘅 “蠔菇”，無咩特別，幸好d菇都炆得好入味。有五隻鵝掌，size 頗大，炆得好入味好淋，不過食完一隻已經覺得好“漏”。下面d白菜仔吸晒D蠔油汁，唔錯。酒香蝴蝶蝦：menu 寫話係得獎名菜，但名過其實，唔係真係咁特別。蝦有用化學品招呼過，所以好爽。d蝦都有酒香味，不過唔濃。碟底係蒸水蛋(蛋白) ，好滑，中間仲有個咸蛋黃。翡翠珊瑚蚌：西蘭花翠綠爽口，珊瑚蚌都好爽口，無沙，好好味。竹笙花膠翅：三個人食實在好大窩，每人有整整兩大碗。夠熱同多料，有肉絲、竹笙同好多花膠絲，不過有D花膠個味怪怪，真係好似“膠”味。整體食物質素有保證，味道唔錯，材料新鮮。不過侍應生數量嚴重短缺，要落單同埋單都要等好耐先會搵到waitress。更不會期望佢地會幫你添翅。