錦成牛什粉麵茶餐廳 (已結業)

依個舖位舊時租俾另一間茶餐廳,晚上一般都有7, 8枱客.自從轉租俾依間茶仔之後,感覺上生意比之前果間仲差左.單睇舖頭名,再加上舖頭外面既座地牌都係推銷粉面餐,會令人以為係淨食牛腩河,水餃面果種舖頭,其實依度一樣有小菜.店內既裝修格局同上一手茶餐廳一樣咁滯,唔夠光猛,真係唔太中意.相信連餐具都繼承咗上一手,睇得出明顯地殘舊.本來叫左香芉炆腩肉,但香芉賣晒,就轉左做春菜炆腩肉,無咁滯都好既.全場得六個客, 大約1/5滿,廚房嘅壓力應該唔大,但都要等15分鐘先至有得食.餐湯先到,係青紅蘿蔔煲粟米.湯都幾甜但依個唔係重點.青紅蘿蔔厲害嘅地方係每一粒都有渣,咁我梗係預計粟米會淡而無味啦,點知係出奇地甜喎.算係食完蘿蔔渣既補償啦.食春菜煲最緊要試下佢嗰啲湯,一口呷落去,太鹹,但係咁樣用嚟撈飯反而啱啱好.春菜煮到淋淋地,非常好嘅質感,雖然湯係鹹咗啲,但係都冇令到春菜過鹹,食落甘甘地,有啲似食芥菜嘅感覺.腩肉就可能分2批唔同時間放落煲度,有幾舊非常鹹,另外幾舊就相當淡.而且腩肉切得太大件,切細一半就差唔多.