豚王 (新城市廣場) (已結業)

因為一啲事，原定嘅餐廳食唔到，唔知食咩好，就去出名多餐廳嘅沙田搵吓食喇，亂亂行就去到哩間豚王，雖然好多地方都有佢嘅分店，但剛好我哋一行人都冇人食過，所以就入去試吓喇。因為見到下午茶好優惠，比正常拉麵平一半價錢，於是兩個女仔就叫咗下午茶拉麵，男仔就叫返正常大細。等咗一陣四碗麵嚟到大家都嚇呆咗，普通嘅果然係普通大細，下午茶嘅細到想喊⋯⋯開心樂園餐都俾佢大份，難怪平咁多😥真係便宜莫貪！不過基本上味道係OK嘅，料都好足，只係所有嘢都迷你咗咁解😅糖心蛋係加錢嘅，食拉麵點可以冇糖心蛋呢？哩隻糖心蛋我非常滿意，冇嘢可以挑剔。餐牌上另外有得點綠茶可樂，大家都好疑惑，到底係咩味，於是就叫咗一支大家試味。um...飲落係綠茶味，但飲完又有少少可樂味，硬要講，我覺得應該叫綠茶汽水，可樂味唔太出，不過係好飲嘅，Good👍🏻