益食家粉麵茶餐廳小廚 (已結業)

再次黎到九龍城, 又唔知食咩好? 行下行下, 忽然見到呢間食店, 見到嘅原因係因為價錢幾平幾吸引, 加上門口有個伙計講玉幾句, 所以決定入去試一試!入到去地方唔算大, 環境一般, 感覺上談不上乾淨; 既然入左黎就照樣睇下有咩好食啦, 粉麵飯樣樣有, 最後師傅揀左黑椒雞扒飯加凍檸茶, 而友人就揀左西炒飯!等左一陣就有得食, 即叫即整熱辣辣, 先講下黑椒雞扒飯, 黑椒汁唔夠香唔夠辣, 所以味道一般, 而雞扒本身亦算滑, 可惜煎得唔夠香, 談不上好味, 雞肋; 西炒飯反而炒得乾身, 料亦好足, 味道開胃加上幾大碟, 都算抵食; 而凍檸茶味道普通, 勉強合格啦!總括黎講食物質素一般, 環境就普通, 服務可以, 價錢唔算貴, 不過幾多錢師傅都唔記得左喇; 晚飯其間師傅不停睇住牆上嘅介紹, 係咁讚呢間食店嘅魚蛋, 講到咁正, 攪到師傅都想整番一碗; 坦白講呢間食店最得都係個店名, 益食家喎, 食完咪真係知係咪益食家囉! 笑臉今次就比唔到, 不過一定會再黎睇試下佢d魚蛋係咪咁出色!