根記健康素食

營業中

休息中

今日唔係好覺得肚餓，同同事兩個人想食Light d ，醒起鵝頸橋街市上面有一間食素食既舖頭 - 根記，就去食個lunch啦。根記位於灣仔鵝頸橋街市內嘅熟食中心，喺最高嗰層。上到去其實有好多間舖頭喺度。最多人排隊嘅係九記牛腩粉，次次嚟都見條龍都好長，真係要搵個機會試吓先。而根記條隊就唔算好長。我哋大概12:45嚟到，前面大概有六個人左右排隊，不過其實大家都係點完餐就坐低食或者拎走，所以好快就到我點餐喇。我決定點一個三餸+飯+素湯餐，盛惠$50。到我點餐啦，我就係大概六個餸入邊揀咗三款，包括煮豆腐，炒雜菜同埋煮南瓜。煮豆腐，職員另外俾個碗仔裝起俾我，豆腐滑捋捋味清淡。炒雜菜即係娃娃菜炒雲耳紅蘿蔔絲，味道正常。至於煮南瓜係我覺得三個入面最好食嘅，因為係比較濃味嘅一款，而且南瓜煮得夠林夠入味。至於個素湯我覺得係成個湯嘅精髓，飲完即刻覺得成個身體清新左。整體味道OK嘅素食店。如果你想間唔中清吓腸胃都係唔錯嘅選擇。