深夜食堂 (已結業)

今日同事就帶咗我去尖沙咀厚福街5樓嘅深夜食堂食午餐。$ 48蚊包自助沙律吧 ，另外加十至八十蚊就可以點埋主菜一款 ，好似幾吸引。一去到 ，望一望個沙律吧 ，第一眼已經被個芝士火鍋吸引住， 熱辣辣嘅芝士，撈麵包食真係一流。另外個南瓜湯都好飲，夠濃又唔算太鹹。沙律吧有生菜可以自己配搭唔同嘅醬汁，例如日式芝麻醬或者千島醬 。另外嗰個豆腐細細件都幾好。煮菜方面我就加廿蚊叫咗個龍蝦汁海鮮意粉 ，分量唔大唔細啱啱好， 帶少少辣味 ，青口好大件 。朋友就加廿蚊點咗個牛肝菌雞肉焗飯。有勁多菇同雞肉。 個飯落咗少少清酒去煮，味道幾特別。反而我幾鍾意出面個露天茶座， 舒舒服服傾下偈食煙都得 。其實尖沙咀真係好多好嘢食，下次再同大家去發掘下。順帶一提， 午餐並冇加一，明碼實價 68蚊有咁多嘢食， 都算物超所值。