豪華咖啡茶廳

營業中

休息中

黎到港島唔一定要食貴野，港島亦有價錢大眾化美食，好似朋友所講，價錢唔代表食物味道一切，最重要廚師有一雙巧手令食物變得好食。我地懷舊一下，走入豪華咖啡茶廳飲下茶食個下午茶治。呢度三文治平絕港島，只係10至15蚊，而且烘底同普通底一樣唔需要加錢，非常實惠。我揀左最基本既烘底餐蛋治，餐肉厚度不薄不厚，亦唔油膩唔偏鹹，比平日一般食開既較岩女生口味。雞蛋亦煎得軟滑，唔會過老，薄片方包烘底後焦脆感更係香味逼人，難以捨棄。香港可以飲奶水蛋既茶餐廳已經少之有少，難得豪華咖啡茶廳依然保留呢種港式特色飲品，仲要只賣14蚊，我冇唔叫既理由😆香甜既煉奶，黃澄澄既蛋黃浮游煉奶之中，輕輕刺穿蛋黃後，不斷攪拌，奶水蛋瞬即變得更為滑順濃香。朋友叫左呢度最有名既蛋牛治，雖然方包烘得好脆，但感覺上蛋牛治比我既餐蛋治望落單薄，口感亦冇餐蛋治豐富，牛肉份量少，有啲失色。呢度既奶茶茶味馥郁，濃郁奶香，層次分明，口感柔順，深得朋友歡心。