嘉仁宮 (已結業)

老婆大人話要去糖街買乳絡食，行過見呢間嘢幾干淨骨子，於是乎入去試下。店子不大，約八九張枱，我叫咗碗醉雞麵，老婆就試蔴辣芥末手撕雞河，再叫咗4個小食：雞湯蘿蔔、東北木耳、荀絲及雞腎。唔知各位有無食過元朗一間好地踎，但好多人幫襯嘅醉雞麵呢？啲雞唔錯，係咸咗啲，豬扒都值得介紹；咦？喺香港講講下做咩入到元朗咁遠嘅...唔好意思言歸正傳！我覺得呢度啲味度啱啱好，酒味好香，雞亦入味有酒香，但雞味唔夠，可能唔係用新鮮雞；係小弟估咋。試過老婆個蔴辣芥末手撕雞河都唔錯，個湯好清香。佢個湯低算清甜，味道又係啱啱好，我係湯怪嚟，「隊」埋老婆個湯及蘿蔔個湯，個年青人(唔知係咪老細，斯文殷勤) 可能見我係咁隊湯，仲問我使唔使加啲湯，我笑住咁拒絕，因為我個肚幾乎爆啦飽到 (飲完無口渴感覺) ...！連杯黑糖薑茶都飲唔落呀陰公；如果個薑茶重啲薑味就滿足啦。嗰4個小食都唔錯，招呼殷勤，提提大家，呢度啲醉雞可以半只或一只咁買走，但要預先打嚟訂囉，餐牌無；整體唔錯食得過，我諗平返啲生意會好啲嘅。再提提各為食友，一定、切記、務必叫人加醉雞汁呀。