麵屋 元祖達摩 (已結業)

今日同家姐去咗太和食拉麵，因為之前同朋友食過覺得幾好食，今次帶家姐黎試下。啱啱過咗lunch time，店舖唔太多人，我地坐咗喺靠牆嘅二人枱，櫈下面有個籃可以放野。我照舊點咗北海道3.6牛乳拉麵🍜個牛乳湯底本身已經好香牛奶味，再將黑松露同蟹籽拌入湯底，令味道層次提升。溏心蛋做得好好，生熟程度剛好，流心得黎唔會太生，而且蛋有用醬油滷過，好美味！豚角煮好大塊，肥瘦均勻，好入味。因為我食拉麵會飲好多湯，怕太飽太膩，所以飲品要咗道地消茶。呢度飲品選擇好多，下次想試下招財貓梳打。家姐鍾意食辣，點咗辛辣拉麵，佢話小辣黎講都算幾辣，個湯好香濃，豚腩叉燒好腍好入味。飲品佢就點咗Apple Cider。