二宜樓 (已結業)

星期六嚟飲茶。標明係客家菜，但係點心紙上絕大多數係普通嘅廣東點心，客家點心得兩、三款。點都要試吓，就點了客家眉豆茶粿(中點$11.8)。可惜茶粿整得太實，差過客家好棧。這裏是新星集團的，所以流沙包(大點$14.8)是招牌點心，。一籠三個，夾開啲餡料流出嚟，都算做到流沙效果，不過食落不覺得特別出色，可能期望太高吧。另外食了叉燒餐包(中點)和叉燒腸(大點)，均屬一般，其中尤以腸粉較差，粉厚偏實，啲叉燒餡又唔好味。點心麻麻，就叫碟家鄉特色炒麵($50)填肚。材料有雞肉、豬肚和蝦等，可惜水準重差，「獻」汁太多太杰，啲料本身又冇味。服務方面亦令人失望，侍應大多懶懶閒，已經冇乜客，還不會快手收碟收籠，另外又見到有幾批客攞住門口知客俾嘅飛仔入嚟，但係冇侍應理佢哋，要佢哋自己搵檯。最後要彈嘅係佢哋嘅抽風系統，由於隔開廚房和我哋用餐地方嘅牆唔係到頂，所以廚房啲油煙攻哂出嚟，認真唔掂。