Cafe Paradise (杏花邨) (已結業)

咁岩要黎杏花村工作，否則都好少會踏足呢個地方。由於唔熟路既關係，都係決定係杏花新城解決我既晚餐。商場内食肆都幾多，最後比呢間餐廳既裝修吸引左入黎。竟然係一個餐廳見到旋轉木馬，又唔係係主題樂園。餐廳内仲有好多不同既公仔，睇得出店主落左好多心思去裝修同佈置。Menu選擇都幾多，最後為左容易d揀就揀左個set。美式BBQ豬排骨 豬排骨好大條，幾乎同我既手臂一樣。望落色水唔錯， 切落發現其實肉比想象中小，但都飽既。旁邊有個醬汁，不過我就唔推薦點，因爲原本舊豬排骨已經好夠味。 蟹籽蟹棒忌廉意大利墨汁寬條麵 寬條麵上面鋪滿蟹籽，一d都唔吝嗇，撈完都仲見到粒粒既蟹籽係每條麵上。麵條食落都ok，但如果可以硬少少就更好。朱古力慕絲套餐仲父送左個甜品，好似每日都唔同，今日係朱古力慕絲，味道還可，略嫌少少硬。總括而言，呢度好適合有小朋友既家庭或者朋友黎，環境不錯，食物都ok既。