Cafe Paradise (已結業)

星期五晚約了老公放工後出旺角行街兼食飯，行了一陣便去揾地方食飯，不過老公話帶我去一個地方食，原來他一早已book左一間餐廳食飯，去到餐廳門口已看到很多人在等位，但最吸引我的目光不是這些人群，而是餐廳櫥窗的旋轉木馬裝飾和聖誕裝飾，未到聖誕已感到很濃既聖誕氣氛，幸好我們有book位，去到便可進入餐廳，餐廳裡一樣佈置得好有聖誕feel, 地方雖然不大，但都坐得幾舒服。Menu 設計得好有心意，我們在看Menu不久，有位侍應行埋黎細心地為我們講解Menu上既餐，如果散叫加錢都可以轉為餐。我們分別點了香脆豬手配燒汁和卡邦尼意粉，之後侍應便送來是日餐湯和田園沙律。 是日餐湯係粟米忌廉湯，湯裡有很多粟米，湯不會太"杰"太稀，很香滑； 沙律既菜很新鮮； 香脆豬手好大隻，仲有配薯角，豬手皮烤得脆卜卜，肉質幼嫩，皮與肉之間有d脂肪，感覺很有骨膠原，但食落很有口感，不覺得肥膩，配埋燒汁簡直一流，值得再試； 卡邦尼意粉既汁很濃忌廉味，意粉口感恰到好處，煙煙韌韌，好好味； 甜品係朱古力慕絲蛋糕，朱古力味濃而不苦又不太甜，細細件岩晒女士們； 餐飲加錢可轉特飲或花茶。