君好扒燒西餐廳 (已結業)

一向都比較中意食西餐，因為可以坐得舒服同優閒啲傾下偈。前兩曰同朋友去咗呢間石板燒，環境真係唔錯，可能閒日嘅關係，人唔算多，之前聽人講過假日嘅時候來就一定要book定位喇。我點咗美國無骨牛肋扒併龍蝦尾，朋友分別點咗肉眼扒併大蝦同羊架併龍蝦尾。主菜未到之前，我哋梗係出去巡視一下有咩前菜同甜品啦！(前菜同甜品係任食架！)有多款新鮮嘅沙律菜啦，配搭唔同嘅醬汁，青口，大蝦，煙三文魚，火腿...仲有兩款湯選擇。再睇下甜品款色都唔少呀，有多款芝士餅同蛋糕。當我哋享用完前菜之後，(已經半飽)，主角出埸喇！職員捧上石板同牛扒龍蝦之後，細心為我哋解釋烹調方法，朋友嘅牛扒煎得耐咗啲，有啲老，但仍不失牛扒嘅肉味，我嘅就好味好多喇！五成熟仲帶少少血水，剛好！龍蝦鮮味彈牙！朋友話蒜蓉包好味，香口鬆脆，可惜我對蒜蓉敏感，冇口福喇。已經好飽！之前仲提醒自己要留肚食我至愛嘅甜品，但我點都要食番三款！愉快嘅晚上，埋單每人三佰幾，唔可以話超值，但論環境氣氛服務，食物嘅質素，值得一試！