星十五

營業中

休息中

之前成日都覺得尖沙咀好似冇得食糖水，但原來呢度收埋咗一間可以打卡嘅糖水舖，咁啱喺附近食完飯終於可以過嚟試吓。嚟到個環境都幾新潮，播住啲jazz嘅音樂其實都幾舒服。聽講呢度最出名嘅由招牌蓮子合桃露，佢呢個合桃露嘅甜度啱啱好，唔會好似其他傳統糖水舖咁太甜。仲有粒粒嘅蓮子肉，加埋幼滑嘅合桃露，唔會好似其他沖水咁樣食到一嚿嚿。夏日炎炎，叫咗個綿綿冰嚟食吓。我哋揀咗個芒果嘅，除咗芒果肉之外，仲有椰果，蘆薈，西米同爆爆珠，口感好豐富㗎。而佢嘅綿綿冰都係用芒果打出嚟，所以真係完完全全都係芒果冰，呢個份量真係要兩個人先食得完。最後仲叫咗個紅棗杞子雪燕牛奶燉桃膠，見到個名咁長就知足料啦。一撈起嚟有好多嘅雪燕，一絲絲，真係童叟無欺。最重要係個牛奶唔會太甜，配埋啲紅棗杞子咁樣清清地，真係好滋陰養顏㗎。最後我最欣賞嘅係佢每一個甜品都會配一杯紅茶，俾你清一清個喉嚨，解一解膩，係一個幾細心嘅準備。