漢城美食 (已結業)

約左好朋友係尖沙咀食晚飯,她提議食韓國菜,因大家都喜愛,而好快就想起整條街好多都係韓國食店同超市既金巴利街,去到就一眼望到“漢城”此食店, 之前曾經經過門口, 剛裝修過,看過食物價錢吾太貴, 又幾地道, 所以決定試試.因為店內吾係太大, 所以門口有d人企係到等緊位, 取票後好彩等左一會已有位了, 而且係門外已順便選好要點既菜, 坐下已立即點菜啦, 我地吾知原來可以自行寫號碼菜落落單紙, 故直接找侍應寫, 而他們都全部只懂說英文, 我地叫左三款未試過既食物：1) 炆牛肋骨: 超好味, 食第一口已讚不絕口, 牛肋骨肉加其他配料(紅蘿蔔,蘿蔔,冬菇) 好腍及好入味. 醬汁可用來送飯.2) 炒辣年糕: 怕太辣頂吾順, 故叫左少辣, 幾惹味及辣中帶少甜，相比前菜(泡菜,辣蘿荀和酸蘿荀)已算輕微辣了, 可接受.3) 炸醬麵: 朋友話成日睇韓劇見人地食得多, 而又未試過, 吾知係未我地耐左食食落唔多夠熱, 但麵身好煙靱, 吾”立口”, 配上黑色甜麵醬及洋葱，好開胃及味道唔錯.掛住食,吾記得影相, 食物種類吾算太多, 但份量較預期大, 坐得都算舒服, 服務還算不錯, 下次會帶媽咪再來試其他食物.