影片
更多
2017-06-22
799 瀏覽
Joey妹就嚟生日，細妹提議嚟呢度同佢慶祝！上次經驗唔錯，加上我鍾意食齋，決定嚟多一次！11：30am，準時入座！我哋三個係第一批客，仲要係頭幾個入座，所以一切食物款式份量俱全，碟碟滿滿熱辣辣，等我哋剪綵！細妹俾錢後(可俾信用咭)，好！開始出動！所有食物放喺門口入口處，呈L型擺放，夾之前，當然又係我部手機食先～我冇食沙律，因為唔想嘥quota, 但見啲菜好新鮮，兼有四款沙律醬汁！我先嚟第一輪，睇返個碟，最好味係茄汁德國素肉丸同黑椒牛扒！前者好有茄汁獅子頭feel, 大大粒，好有肉丸味！後者好鮮味，有咬口，軟硬適中！肉鬆豆腐係凍食，肉鬆拌住滑豆腐，味道啱啱好！冬菇同菜芯都好新鮮！冬菇炆得腍，菜芯夠鮮甜，兩樣都值得推介！豬大腸(係真嘅我一定唔食！咁核突！不過係齋嘅可以試吓！)，味道普通！唯一最難食嘅係涼拌海帶雪麵，凍係凍，不過啲雪麵係浸腍哂嘅苟蒻，啲汁仲要係甜！撈埋海帶帶有少少腥！真係OMG！我細妹叫我唔好要，但我唔想浪費食物，都食哂！另外要讚吓個肉碎釀豆卜，好多肉碎好多汁，豆卜入味，值得一試！細妹夾咗一大碟，每樣分咗啲俾我，所以我都試咗1)麥樂素雞(味道幾好，不過凍咗！)、2)串燒(外型
11：30am，準時入座！我哋三個係第一批客，仲要係頭幾個入座，所以一切食物款式份量俱全，碟碟滿滿熱辣辣，等我哋剪綵！
細妹俾錢後(可俾信用咭)，好！開始出動！
所有食物放喺門口入口處，呈L型擺放，夾之前，當然又係我部手機食先～
我冇食沙律，因為唔想嘥quota, 但見啲菜好新鮮，兼有四款沙律醬汁！
我先嚟第一輪，睇返個碟，最好味係茄汁德國素肉丸同黑椒牛扒！前者好有茄汁獅子頭feel, 大大粒，好有肉丸味！後者好鮮味，有咬口，軟硬適中！
肉鬆豆腐係凍食，肉鬆拌住滑豆腐，味道啱啱好！冬菇同菜芯都好新鮮！冬菇炆得腍，菜芯夠鮮甜，兩樣都值得推介！
豬大腸(係真嘅我一定唔食！咁核突！不過係齋嘅可以試吓！)，味道普通！唯一最難食嘅係涼拌海帶雪麵，凍係凍，不過啲雪麵係浸腍哂嘅苟蒻，啲汁仲要係甜！撈埋海帶帶有少少腥！真係OMG！我細妹叫我唔好要，但我唔想浪費食物，都食哂！另外要讚吓個肉碎釀豆卜，好多肉碎好多汁，豆卜入味，值得一試！
細妹夾咗一大碟，每樣分咗啲俾我，所以我都試咗1)麥樂素雞(味道幾好，不過凍咗！)、2)串燒(外型唔好，有好多毛咁！感覺係冬菇乾物體，但有少少咖喱粉味，我唔鍾意！)、3)蒲燒鰻魚(好普通，試唔試都得！)、4)芝麻醬凍茄子(清淡嘅茄子，軟硬適中！)5)蠔仔(我本身好唔鍾意蠔，特登唔夾，但細妹逼我！質感似鯪魚肉！)。
第二輪，我走出去點咗個肉醬意粉！廚師嬸嬸整俾我，我企喺外面等，見佢整好諗住攞，點知佢遞咗俾個女侍應，女侍應又唔知邊個點？送錯枱！結果我喺後面跟住佢問佢攞返！講吓個肉醬意粉先～好多肉醬！有茄汁嘅酸甜，好大兜！好似半碟意粉咁滯！但啲意粉唔係平時我食開嘅意粉！係扁麵！偏腍同黏，所以同我想像中有偏差！唔可以話難食，但唔係好好食！我撩吓撩吓慢慢食，結果越放得耐越黐得實！
食完個意粉，已飽咗大半！再出去行多轉，又食到好嘢～素菠蘿排骨同素魚扒！前者好入味，好似齋鴨腎！後者都入味，似午餐肉！另外我撈咗兩粒浸喺肉骨茶嘅龍蝦丸同豆腐，龍蝦丸好爽好彈，唔似龍蝦丸！豆腐就似魚腐！呢轉我夾多咗我個情意結～素雞搥！本來已經飽飽地，但好想食！面脆內軟嘅腐皮卷，中間包住支雪條棍，方便你拎嚟咬！我點私伙帶嚟嘅茄汁食，好好味！
最後，甜品喇！荔枝乳酪，我自己吱，吱得幾靚！味道似益力多味沙冰雪糕，好冰凍！好滑！好甜！結果，我出去吱多兩轉，拌多兩舊小蕃薯，味道更加好！蕃薯熱辣辣，軟腍又香甜，拌埋偏甜嘅乳酪雪糕，令到你欲仙欲死！欲罷不能！食完想再食！可惜，個肥腩話我知，我唔可以可食！
食緊蕃薯乳酪雪糕之際，男侍應話有蕃薯糖水，歡迎order！Joey妹要咗一碗，嘩～辣到佢彈起！可能落咗太多薑！好彩我冇要！我最驚食薑！
$118加一，每位平均$129.8，食到飽飽！侍應服務態度好，女侍應臉帶笑容，男女侍應都會主動埋嚟收碟！廚師嬸嬸一眼關七，見個碟啲餸開始少即時refill！唯一值得改善嘅係，燈光偏暗，枱與枱之間條通道較窄，隔鄰枱後來入座嘅阿婆成日出入撞到我張枱！另外，啲碟同杯放喺餸嘅下層，彎低腰先見到！啲杯有少少污糟，但冇地方俾你倒水啷杯！
總括嚟講，一個半鐘，食到飽飽，我哋入座後都越嚟越多客，全部入座起計90分鐘！Red Mango, I'll be back！
張貼
