Barg (已結業)

呢幾年好多美食陸續進駐銅鑼灣耀華街，而其中一棟美食林立既大廈，就一定要數到百樂中心。早幾晚，我就同老婆搵到呢間Barg 西餐廳試下。我地係晚飯時間去食，所以樓下係排左好長人龍準備撘𨋢上唔同樓層既餐廳。不過好在Barg係1樓，咁我地行幾級樓梯就上到去喇。坐低之後，當然即刻睇下餐牌先啦。我地就叫左『紐西蘭托托蜆』，『蝦多士』，『美國安格斯牛柳』同埋『Tiramisu』。先講個蜆，佢就用白酒煮，味道香濃之餘，我真係未食過咁大隻蜆，差唔多有我我手掌咁大，啖啖肉。佢仲跟埋幾塊多士比你點番個湯泥食，好味道！到個蝦多士喇，隻蝦又係一樣大大隻。佢仲要『liu』左啲蝦膏出嚟煮一煮再放番上隻蝦度，夾埋多士一齊食，真係一流。至於個安格斯牛柳，我就要左7成熟。雖然個牛柳都幾厚，不過廚師掌握個生熟度都唔錯，身為『牛魔王』既我都好滿意。最後就係Tiramisu，雖然我唔係啲咩甜品愛好者，不過都覺得呢個Tiramisu整得唔錯，又唔會太甜。總的來說，都好滿意呢間餐廳既水準，有機會番頭試吓其他菜色先。