元洲牛肉麵 (青華閣) (已結業)

呢輪成日喺社交平台關注組見到元洲牛肉麵個名，老老實實，自從強記冇咗，我一向唔多喺街尾搵食，所以都未食過元洲，但有人話佢係長沙灣最靚牛腩。咁勁？真係要親自一試囉。早兩晚行過嚟想試下，居然摸門釘，今次再嚟，有開。仲居然有傳聞中好早賣晒啲紅燒牛肉。紅燒牛肉名不虛傳，厚肉、肉嫩、筋腍，入味，但唔會大重醃料味，整體真係一流，甚至好過當年我幾愛嘅「小王」。配台灣麵，呢個麵底堅係掂，麵身粗幼均勻，熟透但有硬度同彈力，好食過幾乎所有XX牛肉麵。紅燒牛肉個湯濃而不油，牛坑腩個湯就啱啱相反，油光滿面但口感清甜，呢種湯幾鮮味，可以飲晒成碗。坑腩係典型肉、膏、筋分明嗰種，爽口，有少少韌，冇多餘醃味。呢件坑腩我覺得係長沙灣最佳「清湯腩」，計「牛腩」，未能靚絕長沙灣。牛筋大大嚿但好腍，如果鍾意有少少爽口質地就唔對嘴型，我就幾like。佢門口嗰堆辣牛油膏、辣粉，真係真係真係好辣，唔算食得辣咪亂試，會脷都腫。聽講呢間係最後一間「元洲牛肉麵」，好似話都就嚟摺。可惜，希望廚房團隊搵到新落腳地。