博多拉麵別天神 (已結業)

放工喺旺角買完野之後當然要醫埋肚，經過依間鋪見到平日都竟然要排咁長龍，好奇望一望原來係食拉麵！望入去全部都係吧枱，地方唔大，開放式廚房咁，好有日本嘅味道，都幾吸引，所以都排隊試下不過其實都唔需要排好耐嘅，差唔多排到嘅時候仲可以係門口自助點餐，一坐低就好快有得食，方便快捷！嘢食嘅選擇唔多，同朋友分別叫咗別天神套餐同蝦味噌套餐。朋友叫左別天神套餐包左呢個豚骨拉麵，一放低見到奶白色嘅豬骨湯就覺得好吸引既刻偷黎飲啖先，味道好濃，唔錯！至於我依個蝦味噲豚骨拉麵我覺得係更吸引！湯底一飲已經飲到蝦味，而且有勁多櫻花蝦，另外有成隻蛋都好爽！煮得岩岩好流心，醬油味都好出。拉麵方面依間好幼身，麵底偏軟，幾岩我口味。小食方面都有驚喜！個小龍蝦沙律食落有淡淡嘅Wasabi味，而且好足料好多龍蝦肉係入面，夾紫菜食好好味。餃子方面味道冇乜特別但煎得啱啱好所以外皮香脆得黎又唔太窿，不錯！總括嚟講呢間真係冇令我失望，難怪有咁多人排隊