大小姐冰室

營業中

休息中

行完工展會，當然就喺北角食埋晚飯呀，行到英皇道就見到間應該開張無耐嘅大小姐冰室，裝潢好靚好新淨，入去坐落亦都極之舒服，而香港人最鍾意坐嘅卡位，佢都有好大量供應；咁行工展會行到又肚餓又凍，當然要點返個羊腩煲嚟到暖下個身喇，再加埋呢度出名嘅大小姐豬扒焗飯和燉湯就完美喇；最後加杯勁大杯嘅爆珠薄荷特飲和西班牙咖啡當甜品或者飲品都係極之適合！首先講講個羊腩煲，真係好抵食好多嚿羊腩，好淋好入味就算唔點腐乳醬都夠曬味，仲有一碟生菜可以畀你清清喉嚨，實在係完美嘅組合，個羊腩煲入面啲配菜亦都好豐富，有馬蹄冬菇同埋腐竹，真係可以用淋，滑，香嚟形容；至於個大小姐焗豬扒飯，賣相當然係畀大家樂嘅豬扒飯好好多啦，更加上佢焗到溶和脆嘅芝士都溶曬入豬扒同埋飯入面，食落特別有芝士香味，仲有啲拉絲添，豬扒先炸後焗，表面脆而鎖住肉汁，加上番茄同芝士嘅味道，真係齒頰留香，而服務員既專業服務，令到客人有賓至如歸嘅感覺。