德國餐廳 (博文街) (已結業)

一心想食德國菜，搵到Das Bier有幾間分店，嚟到先發現係小店嘅格局，感覺幾溫馨。雖然鹹蛋黃味都好吸引，但係怕醬汁會令到豬皮變淋，所以揀咗最傳統嘅口味。 首先豬皮夠酥脆，上枱已經去咗骨切埋，啖啖肉好正。 豬手真係好軟滑超Juicy，配菜都好有誠意。 酸菜味道唔會好搶，就咁食都唔會太酸，薯仔沙律嘅芥末蜜糖醬超惹味，樣樣野都好啱口味。德國香腸拼盤一碟有齊四款口味，切嗰時要小心好多汁，從未試過簡單如香草豬肉腸都會有肉汁，薯條亦都熱辣辣好有薯味，配齊茄汁同芥茉醬一流。三文魚意粉味道唔算好突出，勝在份量夠多。 呢度普遍都大大份，其實兩個人叫兩份已經好夠。平時少飲酒，但嚟到德國餐廳都襯返個氣氛叫咗杯，估唔到Stella入口好順滑，完全唔會有苦澀味，係好啱女仔飲嘅啤酒。