影片
更多
2013-10-31
3206 瀏覽
都唔係第一次幫襯呢度，記得上次無訂位呆等左成個鐘先有檯，今次weekend帶埋兩個朋友嚟一行三人，梗係預早幾日打去訂位啦！星期五收工即試下去拎檯睇下得未（朋友未到）企櫃位果個哥仔詳細問我貴姓、電話幾號，可能怕搞錯booking或者有人亂攞檯啩？！雖然早左少少，不過照安排到入座！正！樓面阿姐即上個飯前開胃生果，有橙同西瓜各有幾舊，都尚算甜、新鮮！跟住問我要咩煲，嚟呢度梗係食雞煲啦！嗌左半隻雞小辣（因為上次我又係3個嗌左一隻雞，太多食唔到其他野）阿姐仲叫我其他火鍋料慢慢揀雞煲已落單，雖然唔係話非常好禮貌，但基本果d唔該前後、多謝呢d都無少，叫做合格有餘啦！轉頭無耐就聽到廚房焚焚聲，應該係煮雞煲…正當我左揀右揀食乜之察，雞煲已上…不過原來唔係我叫果個，係隔離檯囉！車！呢個時候兩個friend就到！正相討叫乜食，隔離檯個煲傳來陣陣香又辣攻鼻！撞鬼！想引死人咩？！（負責搞訂檯果個哥仔過去搞煲，聽到佢地傾原來係大辣！！唔怪得咁勁啦！）跟手嗌埋個哥仔嚟介紹下食乜好…佢問我地3個食唔食牛？梗係食啦！！打邊爐唔食肥牛點得？佢介紹我地食手切牛（其實我已經想叫，記得上次食美國肥牛，正正常常咁無乜特別）、響鈴
都唔係第一次幫襯呢度，記得上次無訂位呆等左成個鐘先有檯，今次weekend帶埋兩個朋友嚟一行三人，梗係預早幾日打去訂位啦！
星期五收工即試下去拎檯睇下得未（朋友未到）
企櫃位果個哥仔詳細問我貴姓、電話幾號，可能怕搞錯booking或者有人亂攞檯啩？！
雖然早左少少，不過照安排到入座！正！
樓面阿姐即上個飯前開胃生果，有橙同西瓜各有幾舊，都尚算甜、新鮮！
跟住問我要咩煲，嚟呢度梗係食雞煲啦！嗌左半隻雞小辣（因為上次我又係3個嗌左一隻雞，太多食唔到其他野）
阿姐仲叫我其他火鍋料慢慢揀雞煲已落單，雖然唔係話非常好禮貌，但基本果d唔該前後、多謝呢d都無少，叫做合格有餘啦！
轉頭無耐就聽到廚房焚焚聲，應該係煮雞煲…正當我左揀右揀食乜之察，雞煲已上…不過原來唔係我叫果個，係隔離檯囉！車！
呢個時候兩個friend就到！
正相討叫乜食，隔離檯個煲傳來陣陣香又辣攻鼻！撞鬼！想引死人咩？！（負責搞訂檯果個哥仔過去搞煲，聽到佢地傾原來係大辣！！唔怪得咁勁啦！）
跟手嗌埋個哥仔嚟介紹下食乜好…佢問我地3個食唔食牛？梗係食啦！！打邊爐唔食肥牛點得？佢介紹我地食手切牛（其實我已經想叫，記得上次食美國肥牛，正正常常咁無乜特別）、響鈴、大蜆、聖子、手打墨丸/蝦丸…
手打墨丸梗要叫啦！
上次食完念念不忘！無叫海鮮，因為朋友們敏感唔食，之後叫左響鈴、烏冬、生根、金錢肚、鵝腸、芝心包拼貢丸、油麥菜、啤酒4罐。
跟住我地個煲就上到嚟，阿姐話千祈唔好搞因為好熱會辣手整親叫我地等陣，開左爐就行左去…點知我個女仔朋友真係用手郁下個煲！！
即刻辣到手整親仲叫左一下仲喊左出嚟，成班阿姐衝埋嚟問咩事！果個哥仔就叫阿姐拎冰同埋燙火膏嚟…睇嚟我朋友唔係第一個整到…
我朋友就慘，除左辣親手，仲畀我地笑左成晚…哈哈！
之後個哥仔順手幫我地搞下個煲了下佢，有莞茜、芹菜之類的，好香！（順帶講下個哥仔，應該係店長或老細，個樣鬼咁兇神惡殺，但原來又幾好傾幾nice幾好笑，仲氹返我整到個朋友引佢笑）
講返個雞煲，配料都幾多，不過分量加多少少就好！我地都好鍾意莞茜、芹菜、大蒜、蔥呀之類！問佢拎多d，個阿姐每樣拎左少少嚟，話怕果日唔夠賣！姑寒左d囉！
食落d雞都幾滑，甜甜地，辣辣地又麻麻地，都唔係死辣，都幾好，不過我嫌唔夠辣囉！再有機會要食中辣或者大辣！仲有d雞斬得都幾大件！女仔食可能無咁易，我都鍾意細舊少少喇！
半隻雞好快畀我地掃晒食晒！阿姐問我地要辣湯定清湯，我兩個朋友唔太食得辣想加清湯，我就想落辣湯…正在唔知點果陣，個哥仔又行埋嚟睇下問下，傾落佢介紹落辣湯話好味d會夾多d個雞煲味，又話辣湯唔太辣，如果之後覺太辣再加返清湯…（上次我同班朋友加清湯覺得沖淡左唔再辣）所以聽佢講加辣湯。
至於火鍋料；
手切牛 - 正！無渣，幾香又淋！
鵝腸 - 有肥有瘦，正正常常，如果全肥就更正！
金錢肚 - 幾淋，應該煮過或者鹵過，不過得我一個人食囉
響鈴 - 好明顯係佢地自己炸，因為大小不一又脆卜卜，個人覺得浸落湯兩三秒食就最正！
烏冬 - 餐牌寫係稻庭烏冬，但無包裝鬼知咩，不過都幾煙un，都似係急凍手打烏冬。
生根 - 細細個一大碗咁，唔係平時街市買果d…估佢唔到又幾好味，食落應該比平時果d厚身少少！
芝心包拼貢丸 - 我唔鍾意食芝心包，聽朋友講話好好食，我食左一粒，係ok，不過我都係覺得好怪，可能個人問題啦…至於貢丸，我就覺得係正，幾香呀！咬落唔都彈彈地！
啤酒 - 可惜只有罐裝！不過夠凍，算係咁啦！
油麥菜 - 無乜特別，一大碗咁，d菜都算幾新鮮。
手打墨丸 - 呢個好食，又彈又香，裡面有d墨魚粒咁！一黑一白咁出幾得意！阿姐話黑色果隻係加左墨汁落去…我同個朋友剩係食黑色，另外果個朋友話古怪唔鍾意就食白色，剛剛好！
另外要彈下，得果一格廁所真係唔掂囉！要去方便都要睇住有人出嚟先去到！好似去廁所都要搶…不過廁所都幾清潔乾爽，算係咁啦！
仲有個冷氣，凍到傻囉！凍到我兩個朋友拎披肩不特止，仲要我出動埋袋入面件風褸！女仔去，真係要著多件衫呀！
迫，唔係我地，係睇到人地覺得佢地迫…不過坐位都幾舒服既…
總括嚟講，下次有機會都會再嚟（要挑戰食中/大辣）！
呢類非連鎖經營火鍋小店，地方係就係細d迫d，唔同酒樓咁大咁寬敞，不過食物味道、裝修環境、食物擺設都睇到都幾有心，算係咁啦…最後仲有甜品雪米糍畀我地解辣，我就唔食，畀埋個朋友，仲話好味！
食完每人三百零蚊，飽到上心口，仲想點？見出面有人等就識做走人啦，個哥仔見到我地臨出門就提我地拎齊野，唔好漏低野…點知原來我地漏左個袋未拎囉！超𤓓！講聲唔該就走人！
我唔係相機食先，所以無影相喇
張貼