Zecond (已結業)

幫襯完先知上環有間咁好食嘅Cafe兩層樓嘅格局細細地，好寧靜，好舒適～配合埋舖頭燈嘅裝飾，令到餐廳有少少情調～一碗牛肝菌湯已經令我對呢間餐廳留下好印象，已經好期待之後嘅主菜！佢碗湯有好濃烈菌嘅味道，而且唔會水份太稀同時唔會太杰，所以烹調嘅份量與時間都拿捏得剛好。好滿足感飲晒成碗而且唔會覺得好滯，反而好開胃！主菜叫咗一碟海鮮意粉，同平時Cafe食開嗰啲唔同，佢係XO醬大蝦意大利麵。賣相已經見到好足料，足足有四粒大蝦，而且仲有好多碎蝦仔，其實係XO醬嘅餡，所以食落去有少少辣，超級野味！見到佢用咗蝦仔去炒XO醬令到味道更加突出！只要係食得少少辣嘅人都會抵擋唔住，吸引我食晒全部！雖然意粉有啲少少碎，但係見到佢有切粒咁配搭左唔同嘅配料，例如蕃茄、洋蔥、青椒所以感受到佢有花心思去烹調。加上配合埋一杯咁清嘅蘋果汁，飲完落去帶有甜甜嘅清香，令到成餐都唔會太肥膩。整體黎講，味道（醬料與配料）、份量、蝦嘅質素都好唔錯，無諗過一間唔顯眼嘅Cafe咁好食，值得多啲人知道！