Flames (海濱匯)

營業中

休息中

之前同另一半特意嚟呢個之前冇嚟過嘅商場，個商場位置就唔算方便，由牛頭角站行過嚟都要10分鐘，但係個商場本身就非常之乾淨企理，係行高檔路線。間餐廳係開放式設計，空間感滿滿，餐廳有室內同室外嘅部份，不過如果唔鍾意吸入煙味就最好唔好坐咁近室外嗰邊，因為室外嗰部份有好多人會食煙。衛生環境都相當唔錯，大部份侍應都好熱情好客，驚喜地仲有live Band表演，讚賞有加。我同另一個都叫咗個套餐，每個套餐都有一客前菜同埋一客主菜，我哋前菜分別嗌咗個避風塘雞翼同埋青口，避風塘雞翼就中規中矩，而個青口就非常鮮甜可口，甚有驚喜。至於主菜，我哋就嗌咗個大蝦扁意粉同埋西冷牛扒配薯條。個意粉就幾好食，而個西冷扒好有肉味，基本上唔需要點任何汁都好有鮮味，甚至比一啲貴價西餐廳更加好食，至於個薯條配埋佢哋嘅調味粉係非常之惹味，非常推薦。兩個人$600都唔使埋單，我個人非常推薦呢間餐廳。