咖啡綠茶 (已結業)

因為要同一班朋友傾嘢，想搵個地方可以用電腦，又可以坐耐啲，有其中一位朋友就介紹咗呢一間Cafe，話之前嚟過嘢飲唔錯，價錢唔算太貴，而且又可以坐好耐。餐廳坐立既大廈離地鐵站好近，好方便就到，不過個棟大廈就無關於呢間Cafe既任何廣告，所以唔係有人介紹，真係唔知有呢間餐廳係度。一入到去已經覺得好文青，全部裝修都係走木系路線，俾人感覺好舒服。我地坐既四人位仲可以有兩個插頭位用，要用電腦傾好耐嘢都無問題！見到枱面有一個餐牌係一個日式五品料理，好似某餐廳既款式，有得分別揀冷盤同熱食，我就分別揀咗熱食：烤鯖魚+ 豆腐雞肉漢堡；冷盤：煙三文魚薯仔沙津+北海道溫泉蛋+蔬菜蛋批，全部既味道都唔錯，最鐘意係蔬菜蛋批，而溫泉蛋就咁溝飯食都好好味，而其他幾樣菜式都十分唔錯。會配一碗紅米飯呢個餐可以另外半價加嘢飲，我自己就加咗$2X叫咗個香蕉鮮奶，呢杯個味道真係好香，渣又唔會太多，奶加香蕉啱岩好！朋友再另外叫咗個雞軟骨，都好好食！