影片
更多
2015-12-09
1020 瀏覽
家住北角又有細路, 假日實走唔甩要帶佢去公園放電, 鰂魚涌公園同維園都係最近屋企嘅放電場。星期日同呀女去維園放電, 玩到7點幾天都黑齊又愈來愈多蚊, 加上第二日又要返學, 快快鬆人搵地方醫肚。向北角方向行, 行到天后另一地標維多利亞(酒店)附近, 咦..有發現 - ASAP, 食乜架? 我淨係知家吓3仔乸個肚都打緊鼓, 好URGENT要坐低食嘢啫。 再昅吓門口姐姐拎住嗰個menu, 最貴個黑松露意粉餐都係78蚊, 其他餐都60零70蚊左近, 又跟湯, 凍飲又免收, 又免加一, 望入去地方又幾闊落仲要有梳化位喎, 唔諗咁多入去試吓。ASAP - 的確真係幾simple, menu一眼睇晒A-L餐, 12道峰味都仲差一味, 全部都可跟湯或沙律, 嘢飲最正係跟黎已經係炭燒啡, +8蚊升呢變latte。 叫咗C, D, H餐, 跟3個湯(蕃茄湯), 嘢飲嗌咗凍OT凍炭燒同latte。蕃茄湯 - 應該係蕃茄打蓉煮出黎, 酸度適中, 唔腥夠茄味, 唔杰唔稀質感啱啱好順喉。C餐 炸魚柳配柚子醋田園沙律 (3仔乸開心share食) - 魚柳足料新鮮炸, 個䊢夠脆口, 沙律係正常沙律菜撈柚子醋, 味道
星期日同呀女去維園放電, 玩到7點幾天都黑齊又愈來愈多蚊, 加上第二日又要返學, 快快鬆人搵地方醫肚。
向北角方向行, 行到天后另一地標維多利亞(酒店)附近, 咦..有發現 - ASAP, 食乜架? 我淨係知家吓3仔乸個肚都打緊鼓, 好URGENT要坐低食嘢啫。 再昅吓門口姐姐拎住嗰個menu, 最貴個黑松露意粉餐都係78蚊, 其他餐都60零70蚊左近, 又跟湯, 凍飲又免收, 又免加一, 望入去地方又幾闊落仲要有梳化位喎, 唔諗咁多入去試吓。
ASAP - 的確真係幾simple, menu一眼睇晒A-L餐, 12道峰味都仲差一味, 全部都可跟湯或沙律, 嘢飲最正係跟黎已經係炭燒啡, +8蚊升呢變latte。 叫咗C, D, H餐, 跟3個湯(蕃茄湯), 嘢飲嗌咗凍OT凍炭燒同latte。
蕃茄湯 - 應該係蕃茄打蓉煮出黎, 酸度適中, 唔腥夠茄味, 唔杰唔稀質感啱啱好順喉。
C餐 炸魚柳配柚子醋田園沙律 (3仔乸開心share食) - 魚柳足料新鮮炸, 個䊢夠脆口, 沙律係正常沙律菜撈柚子醋, 味道幾好, 唔會太濃太搶, 撈埋啲菜食酸酸甜甜幾爽口。
D餐 咖喱牛肋肉蛋包飯 (小弟食, 呀女抽我水) - 似日式咖喱嗰啲, BB辣, 呀女從來唔食辣都肯試, 仲話幾好味, 口感幾滑撈飯唔錯。牛肋肉有5舊, 夠腍唔黐牙, 夠牛味。蛋包飯, 用真珠米, 蛋皮煎得幾薄, 飯有飯味, 賣相OK。
H餐 黑豚扒意 (兩母女開心share食) - 抽水食咗一舊黑豚, 唔韌夠味, 意粉我無食, 但兩位老細都食到 o習o習聲。
凍炭燒 - 一定唔係天王賣廣告 "過一過火"嗰啲貨色, 夠味唔澀唔鞋口又唔洗加錢, 你話正唔正!
凍OT - 乃呀女至愛, 大老細黐呀女飲咗半杯話啲O味同茶味都夠濃夠香, 我就無試
Latte - 大老細話+8蚊抵飲過又好飲過默默飛嗰杯, 話幾筍吓!
埋單:
Total$212, 由7點幾坐到9點, 其間都有幾枱係一家幾口連(BB)車嘅家庭入黎食, 可能又係去完維園放完電行過試新嘢。不過間嘢地方確係幾闊落, 唔洗同隔離枱迫, 又可以泊好部(BB)車, 坐得都幾舒服。出品唔差, 味道亦算好食, 環境夠闊落, 價錢亦都幾親民, 所以不失為假日放電後去食飯嘅好選擇。唯獨要彈嘅係menu暫時只得12道峰味都仲差一味, 可能滿足唔到啲街坊或者office常客, 想返頭幫襯但選擇少而卻步, 希望menu將來從L打後會有更多新菜式選擇。
- 完 -
張貼