泰 (銅鑼灣廣場二期) (已結業)

疫情以來一直無機會外遊，悶得發慌。襯長假期的開始，今日就同好友選擇咗試一試這間新泰菜，當懷念下去泰國旅行之感吧！他們的餐牌上食物選擇都幾多，而且仲有套餐可揀，套餐內可選的亦唔錯，於是我哋就揀咗一個二人套餐。冬陰功海鮮湯酸辣味道適中，唔會死鹹，而且非常足料，有大蝦有青口，好飲。酸辣鳳爪沙律鳳爪每一隻都大大隻亦好爽口，酸辣調味都係剛剛好，配合青瓜絲一齊食，感覺清爽開胃。黃咖喱雞佢同一般咖喱有啲唔同，並唔係外邊被咖喱汁完全淹沒個種，佢有少少似「撈麵」式嘅咖喱，比較特別，味道都不錯。泰式炒雜菜味道正常，而且帶有少少鹹鮮味。泰式鮮蝦炒金邊粉非常有水準嘅一個金邊粉，蝦夠大隻，而且非常惹味。不過唔食得辣嘅朋友可能要提一提小辣或者將辣粉分開上。套餐加一後兩人一共四百零蚊，而食物質素亦好，下次再諗起泰國時，一定再返嚟幫襯。