Top Blade Steak Lab (新城市廣場一期) (已結業)

心血來潮想食flat iron，突然諗起可以試吓top blade。睇咗幾張食評嘅相都覺得個蒜頭望落去好正，於是叫咗個香草平鐵牛扒。一如flat iron特色，夠軟屬，牛味都好夠。蒜頭煮到好冧，同flat iron幾夾。不過同桌同我都覺得，牛嘅份量唔夠多，如果唔加錢增量的話可能會唔太夠食。是日牛扒係慢煮牛，一樣非常軟身易咬，不過個人覺得呢塊牛味冇香草牛扒咁重。粟米燒得幾香。頭盤嘅沙律就係好健康嘅蕎麥沙律，口味偏輕。南瓜湯就幾濃郁。食top blade最重要當然係任食薯條，唔加胡椒之前，薯條都有陣淡truffle味，加上熱辣辣送上枱，真係忍唔到口食多兩碟。Dirty lemonade 聽講都幾受歡迎，不過自己就覺得佢比較普通，不過唔係非常甜，當係為呢餐解膩都ok。新出嘅特飲開心果奶蓋幾特別，但茶底更令我印象深刻，香味夠又唔澀，如果有單賣紅茶底就好了。附上晚市餐牌，老實講雖然質素唔係差，服務態度都好好，但價錢真係偏貴，唔知係咪地段問題。所以真係偶爾黎吓過口癮就夠了。