南小館 (已結業)

我同朋友都叫咗豐盛拌麵($68)，見佢係王牌，應該都好食掛！上海麵配一塊好似日式叉燒嘅肉同半熟蛋，加埋茶樓會見到嘅酥炸蝦同茶餐廳嘅墨魚丸同菜心，整體感覺怪怪地。雖然話唔係難食，但就同上海野食好似拉唔上關係，感覺更似大雜燴。再講個麵底，由於上菜時，油已經沉咗落碗底，所以個麵餅仍然係好痴身，要用筷子慢慢攪番開。頭幾啖覺得調味唔錯，但食落無耐就開始覺得油膩，我朋友食到一半就已經手停口停。雖然係咁，店面裝修得簡單而開揚，係會令人想坐低傾計休息嘅地方。既有傳統風格嘅水壺、餐具同小食，又有現代化啲嘅傢俱。不過就睇下大家用呢個價錢係想有環境定有好味嘅野食喇。