波士冰室 (已結業)

荃灣千色匯可算是荃灣的龍頭購物兼美食商場，可惜逛到腳仔軟都係買唔到嘢。個肚開始打鼓，老老實實醫咗個肚至為要緊。離遠睇到好大個波士冰室招牌，入面客人坐到八八九九，好旺場。餐廳有特色裝修，大玩六七十年代的懷舊feel，有以前的鐵閘、街市賣魚的紅吊燈、又有鐵皮信箱……餐牌寫住號外 “波士十大必食”，咁誇張? 等我今晚就做個波士 (一晚咁多啦)，叫番三款會一會你。叫咗瑞士汁雞翼、咖喱牛腩飯和原味冰波凍奶茶。奶茶先到。雖然係凍飲，但係都可以聞到茶香味。裡面有兩大粒原味奶茶冰，發揮奶茶膽作用，唔會越飲越啖。咖喱牛腩飯咖喱汁又香又濃，惹味得嚟唔太辣，撈飯一流。牛腩又腍又入味，好食!瑞士雞翼煮得好腍，一啜就可以將佢骨肉分離。個瑞士汁好好味，而且滲到入雞翼裡面，好味到不得了。所以，我認為呢個瑞士汁雞翼，以今晚呢三個十大必食來計，可以排名第一。唔知其餘的七大會係咩料呢? 要搵日來食埋，評評佢先至得。