松山素食 (已結業)

大推呢一間上環熟食店，平時喺上環返工，都知道蘇杭街嗰邊好多好嘢食。呢日食晏經過見到呢一間新開嘅素食店叫做松山素食。出邊嘅裝修都幾靚，外買自取嘅價錢，雙餸飯都只係$30，三餸飯都只係$33。喺中上環一帶都好少見到咁平嘅食店。 見到咁平但係啲食物一啲都唔馬虎，老闆仲好nice咁同我哋介紹每一日嘅餸菜都會唔同。我每款餸菜都係即日新鮮即製，今日我就試咗1號（蟲草花浸津白）2號（怡鄉茄子）同埋6號（涼拌秋葵），而同事就叫咗個松山家鄉銀針粉返公司食。雖然咁平，但係份量一啲都唔小。如果叫每一款午餐餐廳都會送埋例湯，都係素湯嚟㗎夠晒健康可以滋潤一下。咁嘅份量用嚟食晏啱啱好，每一款餸菜雖然冇用肉煮。但係都好好食，尤其是個怡香茄子，同一般嘅魚香茄子係冇分別。大推！至於個家鄉銀針粉清清淡淡咁但係都幾好食，不失為一個健康又好食嘅午餐啊。我諗下次我都會再去呢一間松山素食叫外賣自取。