漢斯 (已結業)

向來茶餐廳平靚正，但為咗遷就價錢，食咗啲都唔知係乜嘢，近排俾我搵到一間看似南亞風格的茶餐廳，餐單刻意多加蔬菜，而且用料揀過，可以食得比較健康。今晚要加班早啲食飯，六點鐘行過嚟晚市剛剛開門，暫時未有咩人比起中午嚟食飯真係梳乎得多！總共黎嗰兩次，一次食椰汁咖喱牛肋條飯，另一次食正宗大蝦喇沙。老闆話喇沙膽是星加坡買過嚟的，成本比較高，但希望做到好口碑，唔怪得食落味道咁正宗，好香滑嘅椰奶，咖喱層次香，仲有係辣辣地，我食得辣所以好鍾意呢個味道，顏色望落去都好靚，材料都俾足，基本嘅豆卜、蛋、蝦、雞柳，因為做健康版本所以特別多左啲蔬菜，所以見到有豆有瓜。椰汁咖喱牛肋條飯好大碟下，咖喱嘅層次香味與喇沙唔同，配合牛肉香，好滋味、好得！套餐是跟多士、湯及餐茶，提一提嗰片脆多士，夠趣之外仲夠香。我睇好呢間餐廳，因為我哋日日出去食晏，長期食用更加要食得健康，呢度款式都幾多仲有豬柳、雞皇、豆腐、叉燒、烏冬、豬扒包、三文治等等，唔驚咁快會食厭。