心裡有素 (已結業)

平時無肉不歡嘅我，今晚應朋友之約，黎到油麻地廣華醫院附近嘅 *心裡有素* 食素buffet，店舖茶餐廳格局，有卡位同圓桌，地方唔算大，但觀感乾乾淨淨。入坐前先買票，而家做緊$98任食90分鐘，呢個價錢相當貼地抵食，目測好多都係熟客捧場，入坐後同店員有講有笑，呢度應該係唔小街坊嘅飯堂😄。近門口位置，放置炸物同涼拌，天婦羅嘅炸蕃薯🍠、炸矮瓜🍆、炸南瓜🎃，炸本菇，全部都炸得唔錯，粉漿薄薄，一啲都唔覺油膩。涼拌有醃蕃茄、滷豆腐、麻辣粉皮，呢邊我鍾意係粉皮，軟軟靱靱，爽爽滑滑，麻而不辣。另一邊近水吧，放左一排有蓋蒸爐，非常衛生，每個蒸爐放左3款餸菜，大約有12款，呢邊全部蔬菜熱葷，椰菜花、苦瓜、矮瓜、黑松露蒸水蛋、滷水蛋、炒麵、炒飯等等….. 款款味道同配搭都唔錯。再另一面就有生果同沙律bar ，凍嘅飲品有檸檬薏米水、雞骨草；熱飲有玄米茶。見倒餐廳不時會轉一轉餸菜，今晚最驚喜係咕嚕合桃，將咕嚕汁重重包圍合桃，酸酸甜甜，又香又脆👍🏻。今次食素體驗非常好，全素感覺好健康，真係食多幾round食到飽飽👍🏻